رسول اللہ صلی اللہ علیہ وآلہ وسلم کی حیاتِ طیبہ سراپا رحمت، ایثار اور غمخواری کی روشن مثال ہے۔ آپ ﷺ نے اعلانِ نبوت سے قبل بھی حلف الفضول جیسے فلاحی معاہدات میں بڑھ چڑھ کر حصہ لیا، یتیموں، مسکینوں، بیواؤں اور نادار افراد کی دادرسی فرمائی اور اعلانِ نبوت کے بعد اسی خدمتِ خلق کو ایمان کا بنیادی جوہر قرار دیا۔
وَمَا أَرْسَلْنَاكَ إِلَّا رَحْمَةً لِّلْعَالَمِينَ
ترجمہ: "اور ہم نے آپ کو تمام جہانوں کے لیے سراپا رحمت بنا کر ہی بھیجا ہے۔"
(سورۃ الانبیاء: 107)
مخلوقِ خدا کے لیے نفع بخش بننا
سرورِ کائنات فخرِ موجودات صلی اللہ علیہ وآلہ وسلم نے انسانیت کے لیے سب سے بہترین انسان کا جو معیار مقرر فرمایا، وہ خدمتِ خلق ہے:
خَيْرُ النَّاسِ أَنْفَعُهُمْ لِلنَّاسِ، وَأَحَبُّ الْأَعْمَالِ إِلَى اللَّهِ سُرُورٌ تُدْخِلُهُ عَلَى مُسْلِمٍ
ترجمہ: "لوگوں میں سب سے بہترین شخص وہ ہے جو لوگوں کے لیے سب سے زیادہ نفع بخش ہو، اور اللہ کے نزدیک سب سے پسندیدہ عمل یہ ہے کہ تم کسی مسلمان کے دل میں خوشی داخل کرو۔"
(المعجم الأوسط للطبرانی: 5787)
فلاحی کاموں میں مساوات اور حسنِ نیت
سیرتِ رسولِ اکرم ﷺ سے ہمیں یہ سبق ملتا ہے کہ ضرورت مندوں کی امداد کرتے وقت رنگ، نسل، زبان یا عقیدے کی تفریق نہیں کرنی چاہیے۔ کینز الہدایہ فاؤنڈیشن کا ویلفیئر مشن دراصل اسی نبوی تعلیمات کا عملی تسلسل ہے، جہاں ہر بے سہارا انسان کی عزتِ نفس کا تحفظ کرتے ہوئے اس کی کفالت اور بحالی کی کوشش کی جاتی ہے۔
